D Anna ud Célina sy beidi Multimedia Produzäntinne u kenne sech syt em Schtudium. Us Lydeschaft zur Muetterschprach, zum Schpile u zum Kreiere vo nöie u eigete Sache, isch im Schtudium ds Projekt «Bärndütsch» u us däm schliesslech d Firma entschtange. Hüt kreiere u designe si au ihrer Produkt säuber, koordiniere d Produktion mit lokale Produktionspartner:inne u sy für ds ganze Marketing u d Kommunikation wi o d Finanze zueständig. Syt aafangs 2025 isch d Marilena a de Pop-Up-Events aus Allrounderin mit derby. Si verchouft d Produkt genau so gärn u mit söfu Lydeschaft, aus währes ihrer eigete.
D Anna isch im Winter gärn uf Skituure im Bärner Oberland, a luftige Täg am Kitesurfe oder mit ihrem Büsli «Martin» ungerwägs. Si chochet für ds Läbe gärn.
D Célina isch gärn ufem Rennvelo ungerwägs oder me trifft se im Kickboxe aa. Si liebt käfele oder aperööle mit Fründ:inne oder der Familie.
I ihrere Freizyt verbringt d Marilena gärn Zyt ide Bärge, spaziert mit ihrem Hung «Bünä» dür d Bärner Autschtadt oder treniert für ihre nächscht Louf.
D Umwäut u d Natur sy üs sehr wichtig. Drum wärde au üsi Produkt unger faire Arbeitsbedingige u gröschteteils ir Schwiz härgschteut. Aui Produkt us Papier und d Verpackige wärde us recyceltem Materiau produziert u sy biologisch abboubar. Schpiufigure u Würfu wärde us Houz gmacht. Mir möchte d Produktionswäg vo de härgschteute Produkt bis zu üs müglechscht churz haute. Drum wärde d Produkt so nöch wi müglech ar Stadt Bärn produziert. Details zu de Produzänt:inne u zu verwändete Materialie gäbe mir uf Aafrag sehr gärn bekannt.
Aues, wo mit Verpackig oder Versand z tüe het, macht ds Blinde- u Behindertezäntrum Bärn (churz «Betrieb B») für üs. Sie nähme d War diräkt vo üsne Produktionspartner:inne a, düe aues i di entschprächende Kartonchischtli verpacke und schicke dini Bschtellig när diräkt zu dir hei.
