bä-dü| de
Gänggele Drylose Das sy mir

Das sy mir

Verzeut vor Anna u vor Célina

Vilech heit dir scho mau öbbis über «Bärndütsch» gläse. Zum Bischpiu uf üsere Websyte oder uf üsem Instagram Kanau. Aber wär gnau schteckt da derhinger?
Mi Name isch Célina, i bi 23gi, bi eher im Chrache ufgwachse, u wohne sit eim Jahr z Bärn. Aber i mache das Ganze natürlech nid allei. I mim Schtudium ha ig d Anna lehre kenne, gäu du Liebi.

Ja genau. De schteue ig mi doch o grad vor. I bi d Anna, bi 24gi, u chume us Bärn. I bi im Breitsch ufgwachse u wohne ize ir Lorraine. Zäme mit dr Célina schtudieri Multimedia Production z Bärn u i däm Rahme isch o ds Projekt «Bärndütsch» entschtange. Weisch no wi aus het agfange?

Ja klar weisi das no. Öbbe vor eim Jahr heimr afah hirne, wasmer gnau wei mache. Öpis mit Bärndütsch isch eigentlech schnäu klar gsi, drum heisst das ja o so, wys heisst.

Absolut. Es hei üs ja o im Schtudium immer aui gseit, mir rede schyns so es «extrems» Bärndütsch u drum heimr das ja ner äbe o wöue mache. Mir hei üs derzue entschiede, Texte z schrybe u o ufznäh. U so heimr d Schprach emu chly chönne zum Usdruck bringe.

Genau. U mir hei plötzlech d Idee gha, no es chlyses Produkt drzue z entwickle. O da heimr viu drüber gschnuret u überleit, was mer chönnte mache. U relativ schnäu ischs ner klar gsy: Es wärde französischi Jasscharte im Bärn-Schtiu.

Es isch eso. I ha ahfa designe u d Célina het id Taste ghoue u üsi Websyte programmiert. Mir hei 300 erschti Jasscharte bschteut u am 3. Juni ischs ner losgange. Aber bi dene 300 Jasscharte ischs nid blybe...

Nei definitiv nid. Mir hei d Jasscharte zersch säuber über üse Online-Shop verchouft. Nach öpe emne Monet si di erschte Drittahbietende drzue cho, u fasch monetlech sys ner 2-3 wyteri worde. Mir hei Jasscharte nachebschteut u nachebschteut.

Ja u mängisch heimr äbe o chly z schpät nachebschteut. Nid nume einisch sy mer ine Charte-Not cho. Aber me lehrt ja äbe o schnäu derzue gäu.

Eh klar! U das ischs definitiv no lang nid gsy, vo Bärndütsch!

Eh nei Das geit auso schono gd e chly wyter. Aber: Mir verrate nid z viu. Was aber sicher isch, isch dass d Jasscharte sicher nid üses letzte Schpieli wärde si. Blybet auso gschpannt!