bä-dü| de
Gänggele Drylose Das sy mir

Ds Telefon am Loebegge

Verzeut vor Célina

Lüt wo ds Bärn wohne, kennes vilech:

Es geit um ds Telefon, wo früecher am berüemt berüchtigte Loebegge am Bärner Bahnhof gschtange isch. Ufgrund vor Modernisierig isch das Buschtelefon 2007 leider wieder abgschafft worde. U trotzdäm schwirrts no bi viune yde Erinnerige ume. Für aui, wos nid kenne u o für aui wo däm Telefon gägenüber e chly nostalgisch gschtimmt sy: I verzeue öich ize ds Gschichtli vom Telefon am Loebegge.

Der Loebegge isch scho syt längerem DÄ Träffpunkt im Bärn. Wüus früecher aber no schwieriger isch gsy, zäme ds kommuniziere, het das bi Verschpätige natürlech o zu viu Fruscht gfüehrt. Us däm Grund het sech ds Warehus Loeb entschyde, y de 80er a ihrem Träffpunkt es Telefon ds inschtalliere. Me het uf das Buschtelefon chönne alüte u irgendöbber het der Hörer chönne abnä.

Aui wo scho mau am Loebegge hei abgmacht, wüsse, dass aui wartende Lüt enang aube chly muschtere, wüu es chönnti ja sy, dass d Person, wome trifft, grad hüt e angeri Jagge anne het aus schüsch. U notabene isch ds Warte ja aube o chly längwylig, u de isch das no e schpannendi Beschäftigung. Das füehrt derzue, dass aube aui e chly derte schtöh, wie d Hüehner ufem Schtängeli. U natürlech würdes o aui sofort merke, wenn öbber öbbis luut würd desume mööge.

Item, we öpper ds Telefon het abgnoh, het ds aube öbbe eso tönt: «Tschou, chasch bitte am Thömu säge, dass d Lisä öbbe e haub Schtung schpeter chunnt?» U de isches aube so gsy, dass me de het pääget: «Du Thömu, d Lise chunnt de öbbe e haub Schtung ds schpät!».

D Bevöukerig het Fröid gha a däm Telefon u es isch o oft gnützt worde - oh no schpät am Aabe u ade Wuchenändi. Wo när aber d Handies sy uf cho, isch d Nützig rapid gsunke. U wüu das Telefon när immer weniger Lüt hei bruucht, isches de im 2007 wieder furt gnoh worde.